انجمن ادبی حافظ اردبیل

کلمه لردن پاسلی زنجیر هورمک آسان دیرمگر

قان ایزین زنجیر دیشینده گورمک آسان دیرمگر

گوز اونونده لئش لئش اوسته پارتلایش لار دال بادال

تیتره یه ن ده دیل دوداق هونکورمک آسان دیرمگر

بویله ساللاخلیق دا سارساخلار ووراندا قهقهه

بیرنفس گولمه ک ویا گولدورمک آسان دیر مگر

باغلانیب دروازه لر ظلم آیری ظلمی تازه لر

سئل سولار زنجیرله نیب پوسکورمک آسان دیرمگر

وار الاهی دن ازل گوندن نفس هربنده ده

بومقدس شعله نی سوندورمک آسان دیرمگر

گئتمز اوزدن هئی یالان دارتار حیاسیزلار بوتون

زور ساتانلار تک یالان دان هورمک آسان دیرمگر

یئر اوزونده قانلی دیش بیر ایت کیمی زنجیر قیریب

ائل لره ملت لره کوشکورمک اسان دیرمگر

ائلچی قانمیر شوم سیاست اهلی نین ماهیتین

پاسلی زنجیردن گوزل سوز هورمک آسان دیر مگر

                     عباسعلی یحیوی (ائلچی)

                      اردبیل  2/10/1387