هرنفس بیر اس ام اس روحومه ساچ تک دولاشیر

فاکس اولور ذهنیمه یارپیز ای یی  فیکریم قاماشیر

من قیزیل گول ده زلال عشوه لرین وورغونویام

گول ترنم ائده ره ک کلمه لریم سئوگی  داشیر

من غزل خورجونو چیگنیم ده دولاننام گئجه لر

ده ریره م گوزلریمه هرنه گوزه ل لیک ساتاشیر

گونش این قبله سی نرگس گوگه ره ن باغچادی گه ل

دستماز آل کی سحر بایداسی آغ سودله داشیر

من تلکس ایم یئتیشنده ن ساری قوشلار الینه

کونلومون باغچاسینا غمزه لی نوت لار داراشیر

دونن اولدوزلار الندی بو اوره ک یارپاغینا

ایندی مرواری دامیر کلمه لریم لن یاناشیر

باخیرام هنده وره ئولکه لری غم بورویوب

حیف اولا حیف اولا انسانلیقا کی سیسقالاشیر

ساغین آی سنفونیا ساچلارینا آرشه چکن

بو گوزه ل نغمه یه لئشخور هورور ایت لر اولاشور

ائلچی سن ائل لری عشق ایله خراباته چاغیر

گرچی  وار- شهرته  قوزعون کیمی دنیا ساواشیر

 

 

عباسعلی یحیوی – ائلچی

اردبیل  22/1/1388