اوره ک ده طاقچا بوجاق دان آلینسادا کالالار
محال دیر قایدا بیگجه لر گلین بالالار
سالیر کمندینه رویالارین طلسمی منی
نه عیبی وار قوجالار بیر زامان اوشاقلانالار
اوشاقلیق عالمی نین آیری شوقی لذتی وار
خوشا او گون کی اوره ک لر بو شوقه ال تاپالار
اوشاقلیقین هوسی کاش دوباره غونچالانیب
چیچک لی خاطره لر ذهن ائوینده یورد سالالار
آغاج مینیب یئنی ده ن سئیر ائده ک او دورانی
نوقول بادام وئره لر تحفه / عمه لر / خالالار
گزیب تاپاق کوچه لرده ن یئنه قیزیل چیچاغا
بیز اوینایاق باجی لار شادمانه ال چالالار
حیف کی کئچدی او دووران او دلربا گون لر
آغاردی ساچلاری گوز یومدو مهربان آنالار
نه بدوانیم وار الیم ده اوچوردام افلاکه
نه ده آچیر قاپوسون قصه لرده داش قالالار
نه قیژقیژیم منه آهنگ اوخور نه قارقا دیلیم
دیدیک دیدیک یئل الینده ایتیب باتیب هاوالار
قایرما بیر یاشایش چئینه یب دی واریوخومو
سو بولبولوم بوغولوب کوهنه دولکه غم بالالار
ایتیرمیشم او نمیش دان دالان دا قابچاقیمی
کیم آلدی ساققامی بیلمه ام نئج اولدو داش مالالار
فلک ده پورسیاراق سیندیریب لوپورت داشیمی
اوچوبدو تونقالیمیز یئل ده ساوورولوب تایالار
نئج اولدو کوچه وبازاری گزدیره ن کله فه ام
هامار گلردی منه آت چاپان زامان چالالار
او قورقوشوم لی تیلان ساققا قالدی دال کوچه ده
جیزیق پوزولدو داغیلدی قازاندیقیم مایالار
خوش آرزی دیر گئنه افسانه لرده سئوگی باغین
گزه ک کونول لریمیز بیر گئجه قوناق قالالار
زمانه حکمی دی گوز جیب ده ال ده اولسون ایاق
کوچه ک او جور کی کوچوب گئتدی بیربه بیر آتالار
حقیقتین بولاغیندان همیشه عشق ایچه گین
گه لن نسیل لره بیزده ن سئویم لی آد قالالار
سالیب حصاره یانار قلبیمی پریشانلیق
او جور کی دالغالار ایچره دورار کیچیک آدالار
فلک گوره ر گوزو یوخ بیر زامان منی گورسون
توکور منیم باشیما گور نه حرص لن قادالار
یویوب اوره ک لری صیقل له سه ک ده ائلچی اینان
دوباره گلمه یه جک بیگچه لر گلین بالالار
عباسعلی یحیوی (ائلچی )
25/10/1376